XIRAFA E CROCODILO

Tres preciosos libros que teñen como protagonistas a un crocodilo e a unha xirafa aos que non importan as diferencias que existen entre eles e constrúen unha vida xuntos que os fai felices.
Son tres libros "con mensaxe" onde o argumento xira en torno á resolución dos problemas que ten unha parella tan diferente: no primeiro crocodilo ten que declarar o seu amor a xirafa; no segundo, deben enfrentarse á incomprensión dos demáis e no terceiro deben resolver o problema de como vivir xuntos nunha casa que se adapte ás características físicas dos dous.
O comportamento dos personaxes, as actitudes tolerantes do crocodilo e a xirafa, constitúen o reflexo da súa natureza bondadosa e a clave da mensaxe que queda como pouso ao rematar a lectura: debemos loitar polo que queremos sen facer dano a ninguén
As ilustracións, de Daniela Kulot, responden ao seu estilo: cheas de colorido, luminosidade e contrastes, e resultan en perfecta harmonía co relato; tamén é moi atractivo o humor co que se expoñen as historias e o deseño das súas páxinas.

Títulos:

Crocodilo namorado
Unha parella diferente
Unha casa a medida

Autora e ilustradora: Daniela Kulot
Editorial: Faktoria K de libros

Idade: De 4 a 8 años

Tamén en castelán:
Cocodrilo se enamora
Una pareja diferente
Una casa a medida

LOS AMANTES MARIPOSA

LOS AMANTES MARIPOSA

Autor: Benjamin Lacombe
Traducción de Elena Gallo Krahe
Editorial: Edelvives

Los amantes mariposa é un álbum en gran formato que recrea unha lenda anónima chinesa e que relata unha tráxica historia de amor na que os protagonistas viven episodios de tenrura e momentos dramáticos comparables aos de Romeo e Xulieta. Na versión creada por Benjamin Lecombe, Naoko, unha moza de catorce anos decide escapar do destino tradicional dunha rapariga chinesa da época e enganar ao seu pai coa intención de estudar literatura na cidade, para o que deberá vivir disfrazada de home. Alí coñecerá ao amor da súa vida e comezara unha fermosísima historia de amor.
O seu estilo sinxelo e as súas extraordinarias ilustracións fan deste álbum unha auténtica obra de arte. Aínda que a editorial recomenda a súa lectura a partir dos sete anos de idade, a calidade e os atractivos da obra tamén enganchan aos adultos.
O ilustrador do libro, o francés Benjamin Lacombe, demostra nesta obra o seu enorme talento xa recoñecido a nivel internacional e que podes constatar na súa páxina.


(Publicado en O recanto de Mik)

UNHA HISTORIA DE AMOR

Andamos rodeados de amor! Próxima a celebración do S. Valentín os sentimentos afloran e mesmo os máis tímidos/as escriben poemas, regalan flores ou lanzan miradas furtivas buscando os ollos da persoa que provoca os seus suspiros. O amor invade as aulas, Cupido campa ás súas anchas polos corredores e na Biblioteca os andeis están repletos de historias de amor, desamor, ilusións, esperanzas...

E facendo unha revisión das miñas lecturas, tentando lembrar aquelas marabillosas historias de amor que deixaron pegada en min pola súa intensidade, pola súa tenrura, pola súa firmeza, pola súa eternidade, dibuxo no meu recordo os corazóns dunha bailarina fermosa e dulce e dun soldadiño coxo e valente, que a pesar das adversidades permanecen fieis ao amor que se profesan máis alá da morte. Nunca souben discernir se o final da historia era ou non un final feliz aínda que sempre me gustou imaxinar que os protagonistas deste conto permanecerían xuntos para sempre, o que os faría eternamente felices. Convídovos a ler ou reler O soldadiño de chumbo, un dos contos máis coñecidos de H. C. Andersen, e que disfrutedes e compartades as aventuras e o amor firme dun soldadiño eivado e a súa bela namorada.

Moi recomendable tamén é El soldadito Salomón, Ed. S. M., de Rocío Antón e Lola Núñez, unha versión libre do conto de Andersen onde o soldadiño, aquí co nome de Salomón, actúa como intermediario para solucionar os conflitos que xorden da mala convivencia entre os xoguetes. Coa axuda dun texto rimado, este libro resulta moi indicado para tratar cos nenos e nenas a solución dos conflitos. O seu ilustrador, Javier Zabala, foi o gañador do Premio Nacional de Ilustración no ano 2005