UNHA CHEA DE FAMILIAS

Nestes días chegou á nosa biblioteca un precioso álbum, UNHA CHEA DE FAMILIAS, de X. A. Neira Cruz e ilustrado por Rodrigo Chao. Cun formato grande, unha ilustración suxerente e de grandes volumes, cun texto cheo de naturalidade e sensibilidade sen rozar a "ñoñería", percorremos da man da nena Mariña o edificio onde vive co seu pai, que podería ser calquera edificio de calquera das nosas cidades, aínda que seguramente Mariña reside nunha vila das Rías Baixas: "Desde esa galería pódese ver o mar. E no mar barcos a navegaren. E as illas Cíes aló ó fondo..."

O respecto pola diferenza, a igualdade, a tolerancia, rezuman durante a lectura; a vellez, a enfermidade e a morte trátanse con naturalidade; China, Marrocos, novos, vellos... nun collage perfecto de aceptación dos outros...

En Rede Lectura podes ver unha reseña deste fermoso libro, e un interesante artigo en Praza das Letras que inclúe unha crítica de An Alfaya, comentarios do autor sobre a historia e personaxes e explicacións do ilustrador sobre as técnicas que empregou. Unha lectura moi recomendable, a partir dos 8 anos.

PÍDEO NA NOSA BIBLIOTECA!!

PERDIDO Y ENCONTRADO

Nunha entrada anterior faleivos de EL INCREÍBLE NIÑO COMELIBROS, de Oliver Jeffers. Deste mesmo autor é outro delicioso álbum, PERDIDO Y ENCONTRADO, da editorial Fondo de Cultura Económica, cunhas orixinais ilustracións cheas de cor e que narra unha inxenua historia de amizade entre un neno e un pingüín que atopa á porta da súa casa e que non sabe regresar ao seu fogar. Despois de averiguar que estes animais viven no Polo Norte, busca a maneira de levalo ata alí. Durante a viaxe descubre o que é a soidade, a nostalxia...
Os estudos AKA produciron unha deliciosa película de animación de 30 minutos de duración. Aquí vos deixo o tráiler, seguro que esta historia vos entusiasmará igual que a min.

Se queres ver algunhas imaxes cunha estupenda calidade preme na seguinte ilustración:

EL INCREÍBLE NIÑO COMELIBROS

TÍTULO: EL INCREIBLE NIÑO COMELIBROS
AUTOR: Oliver Jeffers
EDITORIAL: Fondo de cultura económico

El increíble niño comelibros é un libro-álbum escrito e ilustrado por Oliver Jeffers, artista plástico, ilustrador e escritor irlandés.

Unha tarde, por erro, Enrique descobre que lle gusta comer libros e pouco a pouco convírtense no seu único alimento. Con cada libro que come faise cada vez máis e máis intelixente. E así devora novelas, dicionarios, almanaques, libros de chistes, de historia, de matemáticas… pero os seus favoritos son os vermellos. Enrique pensou que con isto en pouco tempo podería ser a persoa máis lista do mundo, pero de súpeto todo empezou a complicarse: un día síntese enfermo, descomposto...

A aventura glotona deste neno convírtese nunha historia que xoga coa esaxeración e o humor. O autor combina letra manuscrita e tipografía de máquina de escribir sobre fondos en collage con papeis de diferentes texturas, páxinas de libros, follas de cadernos de contabilidade… o que lle dá ao libro un carácter informal e divertido e contribúe a crear un mundo plástico no que o protagonista indiscutible é o libro.
(Para lectores de 7- 8 anos ata 99 anos)

XA O PODES PEDIR NA BIBLIOTECA!!

CHOCOLATA

Hai xa algúns días faleivos do libro-disco Contos en cantos de Almudena Janeiro, un conxunto de cancións a partir dos textos de varios contos. Hoxe quero recomendarvos un deles: CHOCOLATA, un álbum da escritora Marisa Núñez coas ilustracións de Helga Bansch. Este libro obtivo o Primeiro Premio Internacional do Libro Infantil FEE (Fondation Espace Enfants) no ano 2007, e foi traducido a oito idiomas

Sinopse:

Chocolata toma o seu baño diario na lagoa. Un día escoita que na cidade hai unha casa de baños, e sae de viaxe coa intención de probala...
Ao chegar á capital, Chocolata fai unha rápida incursión nos hábitos urbanos máis tópicos, actuales e recoñocibles desde a mirada infantil, e experimenta outro estilo de vida.
A ilustración, é alegre e colorista; expresa con maestría diferentes perfís humanos a través dos animais da selva, e reflicte o humor e optimismo da narración. Un relato sobre as ilusións, os desexos, a amizade, a importancia da experiencia e o valor do que temos moi perto.
[Presentación editorial]

Aquí vos deixo a canción "Chocolata" (Contos en Cantos) para que vaiades facendo boca. DISFRUTÁDEA!